Cyfeiria ‘newid byd-eang’ (global change) at gyfanswm yr effaith a gaiff yr hil ddynol ar y blaned. Mae’n cynnwys newidiadau yng nghyfansoddiad yr atmosffer, newid yn yr hinsawdd a newidiadau yn y defnydd a wneir o dir o ganlyniad i ffactorau cymdeithasol, politicaidd, economaidd, technolegol a demograffaidd.

Mae’r syniad o ‘reolaeth gynaladwy’ yn ddelfryd sydd wedi cael ei mabwysiadu i ryw raddau led led y byd yn ddiweddar. Serch hynny, mae’r afael sydd ganddom ar y drefn sefydliadol sy’n cynnal y ddelfryd mewn ardaloedd porfeldirog fel deheubarth Affrica ac ardaloedd tebyg lle mae’r hinsawdd yn amrywiol, yn wan. Prin yw’r wybodaeth sydd gennym hefyd am ba mor effeithiol yw’r defnydd amrywiol a wneir o’r adnoddau naturiol yn yr ardaloedd rhain. Er bod cryn dipyn o waith wedi ei wneud ar astudiaethau penodol mewn rhanbarthau unigol, mae astudiaethau sydd wedi cyfuno arbenigedd y gwyddorau bio-ffisegol a chymdeithasol yn brin.

Yn ystod y dair mlynedd nesaf, mae’r prosiect a ddisgrifir ar y tudalennau yma am fwrw ati i astudio’r ffactorau sy’n ymwneud â rheolaeth gynaladwy yn y porfeldiroedd mewn astudiaeth gymharol a fydd yn cyfuno disgyblaethau ar draws ystod eang o systemau ffisegol a chymdeithasol.